Më 21 qershor Kushtetuesja shqyrton mandatin e Xhaçkës. Ish-ministrja mohon çdo akuzë për bashkëshortin

Gjykata Kushtetuese do të marrë në shqyrtim mandatin e deputetes së PS-së, Olta Xhaçka më 21 qershor. Mandati edhe pse ka një vendim kundër të Parlamentit, u ridërgua sërish në Gjykatën Kushtetuese nga 44 deputetë të opozitës.

Kreu i grupit parlamentar demokrat, Gazment Bardhi, pasi depozitoi kërkesën tha për mediat se çështja duhet marrë në shqyrtim nga Kushtetuesja me urgjencë, pasi sipas tij bëhet fjalë për dinjitetin e tyre.

Me 72 vota kundër të mazhorancës dhe 39 vota pro të opozitës, Kuvendi i Shqipërisë vendosi kundër dërgimit në Gjykatën Kushtetuese të mandatit të deputetes Olta Xhaçka.

Vetë Xhaçka mohoi çdo akuzë, për përfitime të paligjshme apo konflikt interesi, ndërsa theksoi se bashkëshorti i saj ka vetëm status të investitorit të asistuar dhe jo atë të investitorit strategjik të veçantë.