Meta: Bashkëpunim rajonal në funksion të integrimit në BE

Forcimi i perspektivës europiane për secilin vend të rajonit tonë është kyç për thellimin e bashkëpunimit mes tyre.

Kështu u shpreh Kryetari i Kuvendit Ilir Meta gjatë takimit të zhvilluar në kuadër të Presidencës shqiptare të Kryetarëve të Komisioneve Parlamentare për Politikën e Jashtme të vendeve të Ballkanit Perëndimor (SEECP), e cila po diskuton rreth shkëmbimit të përvojave të vendeve të rajonit tonë në procesin e integrimit.

Meta e vlerësoi takimin si një përpjekje për ta kthyer SEECP në një platformë bashkëpunimi të të gjitha vendeve të rajonit, në mbështetje të axhendës së përbashkët të integrimit në BE.

Kreu i Kuvendit theksoi se zhvillimet e fundit në hapësirën europiane, situata në Lindjen e Mesme, sfidat e përbashkëta në luftën kundër terrorizmit dhe kriza globale na detyrojnë ta shohim të ardhmen tonë me një shikim më të mprehtë.

“Pavarësisht, lodhjes së disa vendeve nga zgjerimi i BE, të cilin ne këtu vazhdojmë ta shohim si projektin politik dhe gjeostrategjik më të suksesshëm për garantimin e paqes e stabilitetit. Ne sot kemi më shumë arësye për të rritur ndjeshëm bashkëpunimin tonë rajonal”, u shpreh Meta, ndërsa shtoi se forcimi i perspektivës europiane për secilin vend të rajonit tonë është kyç për thellimin e bashkëpunimit.

“Koha e politikave të vjetëruara dhe nacionalizmave destruktive ka kaluar tashmë në Ballkan dhe sot është koha e qasjes pragmatike, duke shembut barrierat administrative dhe duke hapur rrugë t e zhvillimit ekonomik. Kjo do të sjellë më shumë mundësi punësimi për qytetarët dhe më tepër stabilitet për gjithë rajonin", tha Meta.