Meta: LSI, forcë e orientuar drejt qytetarëve

Kryetari i Lëvizjes Socialiste për Integrim, Ilir Meta, gjatë një takimi në njësinë 11 në kryeqytet, vlerësoi rezultatet e shkëlqyera të arritura në zgjedhjet e 21 qershorit, ndërsa theksoi se forca politike që ai drejton është e orientuar drejt qytetarëve dhe problemeve të tyre.

Meta në fjalën e tij tha se LSI arriti të trefishojë votat në Bashkinë e Tiranës, duke veçuar suksesin e spikatur në njësinë 11. Kjo punë e madhe, theksoi ai, është rezultat i një ekipi të shkëlqyer, i bashkëpunimit me gjithë komunitetin, ndërsa shprehu bindjen se kjo frymë do të vazhdojë edhe pas zgjedhjeve.

“Tani kemi përgjegjësi më të mëdha pasi kjo përkrahje e jashtëzakonshme e LSI-së na vë përpara përgjegjësisë për të mbajtur të gjitha premtimet që kemi bërë dhe në mënyrë të veçantë për të krijuar perspektiva më të mira për këtë komunitet, i cili ka nevojë për më shumë investime, për më shumë shërbime cilësore, dhe për më shumë punësim, sidomos për më të rinjtë e të rejat”, u shpreh Meta.

Më tej, kreu i LSI-së vlerësoi rezultatet e arritura në të gjitha vendin, ku përveç Tiranës, ai shprehu kënaqësinë për rezultatet në Qarkun e Fierit, Elbasanit, Shkodrës, etj.

“Ne këto zgjedhje LSI arriti një rezultat shumë të mirë në të gjithë vendin. Por ajo që mbetet për t’u theksuar është rezultati jashtëzakonisht pozitiv në Tiranë, në Qarkun e Fierit. Si në Bashkinë e Fierit, ashtu dhe në të gjithë qarkun, LSI-ja doli forcë e dytë politike, duke lënë pas PD-në. Në Bashkinë e Shkodrës dhe në të gjithë Qarkun e Shkodrës, LSI-ja doli forcë e dytë politike. Rezultati në Qarkun e Elbasanit, ku LSI doli forcë e dytë politike për herë të parë; Rezultati në Qarkun e Beratit, ku dolëm forcë e dytë. Natyrisht edhe Qarku i Gjirokastrës ku LSI-ja doli për herë të parë forcë e parë politike”, tha Ilir Meta.

Ai nenvizoi  faktin se LSI-ja tashmë nuk është thjesht një forcë e tretë dhe se atje ku drejtuesit e saj kanë besimin se do të gëzojnë reputacionin e duhur, do të dinë të punojnë me një frymë gjithëpërfshirëse, duke qenë të hapur me mbarë simpatizantët, me të gjithë qytetarët, LSI-ja del forcë e parë.