Meta nuk pranon humbjen në Kuçovë: Do ta kontestojmë masakrën elektorale deri në fund

Kreu i Partisë së Lirisë, Ilir Meta nuk e pranon humbjen e kandidatit Lefter Maliqi në bashkinë e Kuçovës. Gjatë një takimi me kryetaren e PL-së në Kuçovë, Erisilda Hoxhën, Meta tha se rezultati i zgjedhjeve për bashkinë e Kuçovës do të kontestohet deri në fund dhe nuk do të pranohet kurrsesi. Nga ana tjetër, Meta nënvizon edhe se qytetarët kanë zgjedhur Maliqin si kryebashkiak dhe jo Kreshnik Hajdari i Partisë Socialiste.

Postimi i plotë

Mirënjohje pakufi për Erisilda Hoxhën, Kryetaren e Partisë së Lirisë në Kuçovë dhe gjithë ekipin e mrekullueshëm mbarëopozitar, që fituan zemrat e shumicës të qytetarëve të Kuçovës, të cilët zgjodhën Lefter Maliqin Kryebashkiak. As dhuna policore, as krimet zgjedhore gjatë fushatës dhe ditën e votimeve nuk i zmbrapsën në betejën për Ndryshim. Masakrën elektorale në Kuçovë do ta kontestojmë deri në fund dhe kurrë nuk do ta pranojmë. Gjurmët e krimeve zgjedhore janë të mirëdokumentuara dhe nuk do të anashkalohen kurrë.