Meta përshëndet 75-vjetorin e OKB: Gurthemel i një bashkëpunimi shumëpalësh, anëtarësimi i Kosovës do sillte përfitime

Presidenti Ilir Meta ka përshëndetur dhe uruar 75-vjetorin e themelimit të OKB që përkon edhe me anëtarësimin e Shqipërisë 65 vite më parë.

Meta shkruan se Shqipëria ende vijon të besojë thellësisht tek OKB si një gurthemel i bashkëpunimit shumëpalësh të bazuar në rregulla nga ku fiton bashkësia globale.

Ai uron për një të ardhme të ndritur të Organizatës dhe riafirmoi edhe një herë mbështetjen përkushtuar Shqipërisë.
Më tej Meta përmendi edhe Kosovën për të cilën tha se anëtarësimi i saj në OKB do të sillte përfitime për gjithë bashkësinë ndërkombëtare.

Mesazhi NGA ILIR META

Në këtë jubile të rëndësishëm, të 75-vjetorit të themelimit të OKB, që përkon me 65-vjetorin e anëtarësimit të Shqipërisë në të, besojmë thellësisht se Kombet e Bashkuara, mbeten ende gurthemeli i një bashkëpunimi shumëpalësh të bazuar në rregulla, nga i cili përfiton bashkësia globale si e tërë.
Shqipëri ka përqafuar dhe ka zbatuar parimet e Kartës së OKB-së dhe ka mbështetur dhe vazhdon të mbështesë çdo përpjekje ndërkombëtare në të mirë të paqes dhe sigurisë, sepse besojmë fort se multilateralizmi është thelbësor për trajtimin e sfidave globale.
Në këtë 75-vjetor të Organizatës sonë, shprehim mirënjohjen e thellë për mbështetjen e vazhdueshme që kemi marrë nga OKB, që provoi edhe në këtë vit fatkeqësish natyrore për vendin tonë, se ishte një partnere e vërtetë, veçanërisht me ndihmën e dhënë për tejkalimin e pasojave të tërmetit tragjik dhe përballimit të COVID-19.
Duke uruar, në këtë përvjetor, një të ardhme sa më të ndritur për Organizatën tonë dhe të gjitha vendet e saj anëtare, do të dëshiroja të riafirmoja dhe një herë mbështetjen e përkushtuar të Shqipërisë për një rend të mirëbazuar në rregulla, të reformuar dhe ripërtërirë, me Organizatën e Kombeve e Bashkuara në qendër të tij.
Shqipëria beson fort se Republika e Kosovës është faktor i rëndësishëm i sigurisë dhe stabilitetit në rajon dhe anëtarësimi i saj në të gjitha organizatat ndërkombëtare, përfshirë këtu Kombet e Bashkuara, do të sillte përfitime jo vetëm për Kosovën, por edhe për mbarë bashkësinë ndërkombëtare.