Meta pritet nga zyrtarë të drejtësisë: Reforma në fazën përfundimtare

Në ditën e dytë të vizitës në SHBA, Kreu i Kuvendit Ilir Meta u prit nga ndihmës Asistent Prokurori i Përgjithshëm i SHBA, Swartz. Meta tha se reforma në drejtësi është në fazën e saj përfundimtare, atë të miratimit.

Meta: Angazhim për miratimin sa më të shpejtë të paketës kushtetuese. Vlerësoj opinionin përfundimtar të komisionit të venecias dhe punën e paanshme e profesionale të EURALIUS dhe OPDAT. Kjo reformë e thellë do të shërbejë për rritjen e profesionalizmit dhe integritetit të sistemit të drejtësisë, rritjen e besimit të publikut si dhe përmirësimit të klimës së biznesit në vend. Ne jemi të vendosur, ta çojmë përpara këtë reformë edhe me plotësimin e akteve të tjera ligjore, si një domosdoshmëri për të luftuar me efikasitet korrupsionin, krimin e organizuar dhe për t’i dhënë fund kulturës së pandëshkueshmërisë në Shqipëri.

Gjatë diskutimit për fazën zbatuese të kësaj reforme,  Meta nënvizoi se për ngritjen e institucioneve të reja që parashikohen nga paketa kushtetuese, përfshirë këtu edhe Byronë Kombëtare të Hetimit, ndihma dhe asistenca e SHBA për monitorimin e zbatimit të saj është jashtëzakonisht e rëndësishme. Me rëndësi të veçantë, theksoi  Meta, është edhe rritja e kapaciteteve të hetimit të pavarur dhe profesional.
Ndihmës Asistent Prokurori i Përgjithshëm i SHBA për Bashkëpunimin Ndërkombëtar, Bruce Swartz shprehu rëndësinë e veçantë që SHBA i kushtojnë miratimit të kësaj reforme dhe theksoi se Departamenti i Drejtësisë dhe misionet e asistencës OPDAT dhe ICITAP do të vazhdojnë të kontribuojnë dhe të mbështesin forcimin e agjencive të zbatimit të ligjit në Shqipëri.

Swatz shprehu gjithashtu vlerësimin për bashkëpunimin e ngushtë mes dy vendeve në kuadër të luftës kundër terrorizmit dhe krimit të organizuar.