Meta: Solidaritet me Belgjikën, terrorizmi s’ka vend në Evropë

Kryetari i Kuvendit, Ilir Meta ka reaguar paraditen e sotme lidhur me ngjarjet e fundit tragjike në Bruksel, ku nga disa shpërthime terroriste kanë mbetur me dhjetëra persona të vrarë e të plagosur.

“Në solidaritet të plotë me Belgjikën dhe me të gjithë qytetarët e Brukselit. Terrorizmi nuk ka vend në Evropë. Shqipëria gjendet përkrah partnerëve euro-atlantikë për të çrrënjosur celulat terroriste”, ka qenë mesazhi i tij.

Duke shtuar më tej se sulmi ndaj Brukselit, në fakt përbën një sulm ndaj gjithë Evropës dhe njerëzimit.

“Ngushëllime familjeve të viktimave dhe shërim të shpejtë të plagosurve. Të vendosur se së bashku do të mbrojmë vlerat demokratike që na bashkojnë”, përmbyllet qëndrimi i kryeparlamentarit shqiptar, Ilir Meta lidhur me ngjarjet tragjike sot në Bruksel.