Meta thirrje qytetarëve për 14 majin: Mos hezitoni të votoni pasi abuzimet e qeverisë vetëm thellohen

Kur na ndajnë edhe pak muaj nga zgjedhjet lokale të 14 majit, kryetari i Partisë së Lirisë, Ilir Meta, u ka bërë thirrje qytetarëve që të mos hezitojnë, por të dalin dhe të votojnë.

“Vota është instrumenti më i çmuar i qytetarëve për të ndalur arrogancën dhe brutalitetin e kësaj Qeverie të korruptuar. Për të gjithë ata qytetarë, që edhe pse janë të pakënaqur, hezitojnë të votojnë, apeli im është ky: Nëse nuk merrni pjesë në votime, abuzimet e Qeverisë ndaj jush, jo vetëm do të thellohen, por duke mos votuar, ju nuk do të keni të drejtë dhe të ankoheni! Prandaj 14 maji është jo vetëm mundësia e ndëshkimit të Qeverisë, por edhe dita e triumfit të zërit qytetar”, tha Meta në një intervistë për Vizion Plus.