Meta: U bë një maskaradë politike për të tërhequr vëmendjen nga afera korruptive e inceneratorëve

Teksa e quajti maskaradë politike vendimin e Kuvendit për shkarkimin e tij në Gjykatën Kushtetuese, Presidenti Ilir Meta thekson se u bë për të shmangur vëmendjen nga aferat korruptive të inceneratorëve.

“E gjitha kjo maskaradë politike u bë për të tërhequr vëmendjen nga afera korruptive e inceneratorëve. Kjo është një lojë e mbaruar. Presidenti nuk ka shkelur asnjë ligj dhe as një nen të Kushtetutës së Republikës së Shqipërisë. Asnjë fjalë nuk tërheq nga ato që kam thënë”.

Situata e tensionuar në zgjedhjet e 25 prillit, për kreun e shtetit u bë nga mazhoranca e cila sipas tij kishte vetëm një qëllim, atë të kapjes së të gjithë pushteteve.

“Ngjarja e Kavajës dhe e Elbasanit u provokua nga vetë eksponentë të mazhorancës. E vetmja pengesë e tyre ishte Presidenti i Republikës. Unë jam krenar që edhe i vetëm si Institucion, para mazhorancës kam kthyer çdo ligj të paligjshëm dhe të padrejtë, duke bërë qëndrese të argumentuar para çdo padrejtësie”.