Ministrat Bledar Çuçi dhe Milva Ekonomi betohen para Presidentit Meta (FOTO)

Pas propozimit nga kryeministri Edi Rama për lëvizjet në kabinetin qeveritar, Bledar Çuçi dhe Milva Ekonomi janë betuar këtë të premte para Presidentit Ilir Meta. Bledar Çuçi u betua si ministër i Brendshëm në vend të Sandër Lleshaj, ndërkohë që Milva Ekonomi do të zëvendësojë Çuçin në detyrën, duke u betuar si ministre e Bujqësisë.

Deklarata e plotë nga Presidenca

Në Institucionin e Presidentit të Republikës u zhvillua sot në mesditë ceremonia e betimit të anëtarëve më të rinj të kabinetit qeveritar, Ministrit të Brendshëm, zotit Bledar Çuçi dhe Ministres së Bujqësisë dhe Zhvillimit Rural, zonjës Milva Ekonomi.

Pas ekzekutimit të himnit kombëtar, Ministri Çuçi dhe Ministrja Ekonomi u betuan me dorën mbi Kushtetutë para Presidentit të Republikës, Sh.T.Z. Ilir Meta: “Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave”.

Kreu i Shtetit u dorëzoi dekretet përkatëse të emërimit Ministrit të Brendshëm Çuçi dhe Ministres së Bujqësisë dhe Zhvillimit Rural Ekonomi, duke u uruar suksese në detyrat e tyre të reja e të rëndësishme. Në ceremoni, ishin të pranishëm Sekretari i Përgjithshëm i kryeministrisë, zoti Engjëll Agaçi si dhe anëtarë të Kabinetit të Presidentit.