Ministrat e Kosovës nënshkruajnë marrëveshjet me Shqipërinë, kusht nga Kurti për takimin me Ramën

Ministrat e Kosovës kanë nisur të nënshkruajnë marrëveshjet me Shqipërinë që ishin parashikuar të firmoseshin në mbledhjen e anuluar të dy qeverive që do të mbahej më 14 qershor.

Ministrja e Drejtësisë, Albulena Haxhiu  hodhi firmën në marrëveshjen e firmosur më herët nga homologu shqiptar për akordin mes dy vendeve për njohjen e së drejtës për ushtrimin e profesioneve të avokatit dhe ndërmjetësit në zgjidhjen e mosmarrëveshjeve.

Në mëngjes kryeministri Edi Rama deklaroi se 13 marrëveshjet e firmosura nga pala shqiptare i ishin dërguar Ministrisë së Jashtme në Kosovë, si një përpjekje që u komentua si një tentativë për të plotësuar kushtin e Kurtit për të takuar me Ramën.

Ishte kryeministri Kurti që reagoi pas lajmit për ndalesën e Ramës në Kosovë në kuadër të turit ballkanik, për të cilin tha se do të takohej me kryeministrin e Shqipërisë vetëm pas mbajtjes së takimit mes dy qeverive që sipas tij kishin lënë marrëveshjet në sirtar.