”Ministreshat muhabetqare”, Gjekmarkaj thirrje Ramës që të vërë rregull: Njëra flet për byrek, tjetra për japrak

Nënkryetari i Kuvendit, deputeti demokrat Agron Gjekmarkaj ka ironizuar ministret e qeverisë ”Rama 3”, për sjelljen e tyre në Kuvend. Përmes një postimi në facebook, Gjekmarkaj i kërkon me ironi kryeministrit Edi Rama të vërë rregull pasi shton se nuk është e lehtë të mbash fjalën në Kuvend teka dëgjon zëra nga mbrapa. ”Qeveria rri urtë si dele perëndie, salla poshtë po kaq me kërshëri. Po kur ti Babo ikën këpusin zinxhirët e fillon rrokullima. Hukama e piskama presin vertikalisht e horizontalisht Kuvendin. Salla boshatiset e kafja mbushet. Po nuk është ky thelbi i ankesës time të përunjur”.

Statusi i plotë i Agron Gjekmarkajt

Ankesë Babos për ministreshat muhabetqare! Babo ti je goxha njeri! Ty zallamahia të bezdis. Rremuja e rremeti, gazepi e qameti po kaq. Babo ti je armik i madh i akraballëkut. Ti do paqe, lezet, marifet e vëmendje. Kur ti Babo vjen në sallë nuk pipetin as miza, të gjithë sus. Edhe ne të opoziteë gezohemi, themi erdhi Babo e do na gajasë, do i bjerë monotonisë me çifte.

Qeveria rri urtë si dele perëndie, salla poshtë po kaq me kërshëri. Po kur ti Babo ikën këpusin zinxhirët e fillon rrokullima. Hukama e piskama presin vertikalisht e horizontalisht Kuvendin. Salla boshatiset e kafja mbushet. Po nuk është ky thelbi i ankesës time të përunjur.

Po të drejtohem si edukator i epërm që je Babo. Ja sot mora fjalën dhe u llafosa për vizitën në Vatikan, u tregova ca historira e gjëra si logjikë e moteve që përjashtojnë rastesitë. Po ç’të të tregoj mor Babo! Delines nuk i pushonte goja, dërr dërr e dërr dërr! Duket sa të jetë Zamo ajo mund të llafoset sa të dojë e të qeshë po kaq me llaftar.

Parabolat e Ulsiut i dukeshin ku e ku më interesante se historitë me Papë e Buzukër, Bogdane e Kuvend Arberit! Nuk u bëra xheloz per erudicionin e Ulsiut, thjeshtë e admirojmë. Të qeshura Babo, zgërdhirje Babo e gajasje pa fund, zukama Babo. Të flasësh me një koshere bletësh nga pas nuk është e lehtë.

Rixha Babo qortoji nga pak qerrateshat se vetëm të mos flasin po ju kërkojmë, as punë as rroga, as rënd, as gjë prej gjëje. Kam besim Babo që i vrenjtur do i nakatosesh e këtë maraz do ma heqesh. Jo të gjitha! Këto afër Ulsiut ai i uruari i shtie në ngasje dhe i derdh në gaz. Njëra fliste për byrek, tjetra për japrak! Njëra për rroba, tjetra për diete. Më nxinë jetën Babo! Shpëtona nga muhabetqaret.