Ministri i Jashtëm grek në Tiranë me 7 propozime konkrete

Një prej pikave që do të diskutohet është korrigjimi teknik i skicimit të hartës për marrëveshjen e detit të nënshkruar në vitin 2009 nga qeveria Berisha, pasi qeveria greke nuk ka pranuar rinegocim për këtë çështje, por do të marrë në konsideratë korrigjimet e mundshme teknike.

Ministri i Jashtëm grek Nikos Kotzias pritet të vizitojë Tiranën në dy javët e fundit të korrikut.

Vetëm pak ditë pas vizitës së tij në Serbi, ndalesa e kryediplomatit grek në Tiranë do të shërbejë për trajtimin e çështjeve të nxehta që prej kohësh ekzistojnë mes dy vendeve.

Gjatë këtyre takimeve, sikurse citon e përditshmja greke “Kathimerini”, do të shqyrtohen problemet ekzistuese në marrëdhëniet dypalëshe.

Pala greke do të ulet në tryezën e bisedimeve me 7 propozime konkrete: 1) Korrigjimi teknik i skicimit të hartës për marrëveshjen e detit të nënshkruar në vitin 2009 nga qeveria Berisha, pasi qeveria greke nuk ka pranuar rinegocim për këtë çështje, por do të marrë në konsideratë korrigjimet e mundshme teknike; 2) Do të diskutohet për heqjen e ligjit të luftës me Shqipërinë e miratuar nga Greqia që në vitin 1987; 3) Do të diskutohet për respektimin e të drejtave të minoritetit grek në Shqipëri; 4) Do propozohet ndërtimi i 3 varrezave për të rënët në Shqipëri; 5) Me homologun e tij shqiptar Ditmir Bushati, Kotzias do të diskutojë edhe për njohjen e shtetit të Kosovës nga ana e Greqisë.

Duke cituar gazetën greke “Kathimerini”, një nga propozimet e qeverisë greke, është kërkesa për qeverinë e Edi Ramës, që partia çame PDIU të largohet menjëherë prej saj pasi nga Athina konsiderohet si një forcë nacionaliste dhe penguese e marrëdhënieve të mira mes dy shteteve fqinje.

Edhe një herë, në takimin e korrikut, kryediplomati grek do të shprehë në kryeqytetin shqiptar, mbështetjen e Greqisë për perspektivën europiane të Shqipërisë. Nga ana e qeverisë greke, kjo vizitë shihet si një mundësi për të sheshuar problemet disa vjeçare mes dy vendeve.