Ministri Manjani: Çdo person king, grup, i fortë, ministër, zyrtar, nëse ka shkelur ligjin do të jetë prapa hekurave

Ministri i Drejtësisë, Ylli Manjani ka folur sot për Klemend Balilin. Manjani tha se operacioni me autoritetet greke dhe me DEA-n amerikane vazhdon që prej muajt mars.

“Ky person është shkarkuar sot për t’u dhënë hapësirën e nevojshme të gjithë organeve të hetimit. Kjo është minimalja që duhet të merret ndaj një qytetari, pavarësisht se atë askush s’e ka thirrur. Të merret të hetohet si një qytetar i lirë dhe të vazhdojë jetën e vet. Operacioni policor nuk është i 48 orëve të fundit, por vijon që nga muaji mars. Ministri i Drejtësisë ka një raport komplementar në raport me organet e shtetit. Kemi përcjellë të gjitha letërporositë e nevojshme. Kam dijeni dhe besoj se e gjitha kjo shkon në mënyrë zyrtare në favor të një hetimi të plotë. Publikimi i këtyre gjërave nuk i ndihmon hetimet, ndaj jemi të rezervuar në informacione”, tha Manjani duke shtuar se:“Ka mbështetjen time, Policia e Shtetit, policia e shtetit grek, organet e hetimit, prokurori i përgjithshëm i të gjithë institucioneve. Kërkesa ime ka qenë dhe mbetet një, cilido person king, grup, i fortë, ministër, zyrtar, nëse ka shkelur ligjin do të jetë prapa hekurave”.