Ministrja Kushi i përgjigjet Vokshit: Nuk bëj show, kam një muaj që të pres në gjykatë

Deputetja demokratike Albana Vokshi tha se këtë të mërkurë mori pjesë në seancën gjyqësore për një padi të bërë ndaj ministres së Arsimit, Evis Kushi, për tezat e provimit të maturantëve të cilat u dolën para provimeve. Kushi i është përgjigjur nga foltorja e Parlamentit, duke thënë se ajo nuk ishte e pranishme në Gjykatë pasi ndodhej në një samit në Paris.

“Znj. Vokshi dje bëri një deklaratë para gjykatës, duke vazhduar të kryejë të njëjtën vepër penale, për të cilën e kam thirrur në atë gjykatë. Dje nuk munda t’i përgjigjem sepse isha e ftuar në Samitin e Arsimit në Paris, një event madhështor ku morën pjesë ministrat e 145 vendeve të botës. Kam 1 muaj që e pres në gjykatë. Herën e parë nuk më erdhe, edhe herën e dytë që isha aty prapë nuk më erdhe me pretendimin që nuk kishe marrë njoftim. Dje për shkak të angazhimit në samitin e Parisit u përfaqësova me avokat, ndërkohë që edhe në dy seancat e para nuk ishit e përfaqësuar nga dikush”,-tha Kushi.

Po ashtu Kushi tha se nuk doli të bëjë show politik e publik, por po pret vendimin. ”Kam bërë padinë, ju kam akuzuar për shpifje dhe po pres e qetë vendimin e gjykatës, sepse unë i besoj drejtësisë, ndërkohë që ju akuzat i hidhni në facebook. Çojini në gjykatë, dhe pastaj bëni shou me vendimin e gjykatës, por jo pa fakte”.