Mjeku Bardh Spahia: Po luhet me jetën e njerëzve. 6 të dyshuar në Shkodër dhe asnjë tampon

Ish-deputeti i PD-së, mjeku Bardh Spahia ka denoncuar sot mungesën e masave nga qeveria “Rama” për të bërë analizat e personave të dyshuar me koronavisur. Në një mesazh në Facbook, Spahia ka publikuar denoncimin e mjekëve në Shkodër, i cili deklaron se nuk ka tamponë për qytetarët që kanë ardhur nga Italia në Shkodër.

Postimi i plotë i Bardh Spahisë:

A KA MUNGESE TAMPONASH APO THJESHTE PAPERGJEGJSHMERI?

Shqetësimi kryesor i mjekëve në këtë periudhë është mungesa e tamponëve dhe mjeteve për të bërë analizat e COVID-19.  Në Shkodër, personeli shëndetësor denoncon se ka raste të dyshuara për qytetarë të ardhur nga Italia dhe nuk ka tamponë për analiza!

Po bëhen dy javë që mjekët, qytetarët dhe opozita po e ngremë këtë shqetësim, por Ministrja e Shëndetësisë, hesht pa dhënë asnjë përgjigje. Që prej të premtes po bëhen shumë pak analiza. Edhe sot janë bërë vetëm 32 teste, ndërkohë që numri i personave të infektuar është në rritje të vazhdueshme.

Si dreqin mund të jetë papërgjegjshmëria deri në këtë masë? Si mund të mos merren masa por të heshtet e të sulmohet kushdo që denoncon këtë situatë? Heshtja dhe fshehja e kësaj situate është kriminale! Nuk mund të luhet kështu me jetët e njerëzve!