Mjeku i njohur shqiptar nga Spanja: Në Shqipëri po jepet mjekim i gabuar

Nga Spanja, mjeku shqiptar Kita Sallabanda, deklaroi mbrëmë në Opinion” se informacionet nga vendi ynë tregojnë se të dyshuarit apo të sëmurët me Covid-19, po mjekohen në fazat e para në mënyrë të gabuar. Sipas tij ka një tendencë për të fryrë faturat e kurimit, duke e bombarduar të prekurin me gjithfarë antibiotikësh dhe ilaçesh anti-viralë, të cilët nuk ndikojnë fare, por përkundrazi dëmtojnë organe të tjera.

Sipas Sallabandës (i cili tregoi edhe një shembull me familjarë të tij), në fazën e parë të sëmundjes, duhen përdorur vetëm vitaminat dhe paracetamoli.

“Paracetamol, vitaminë D, vitaminë C, këto janë në fazën e parë, asgjë tjetër”, deklaroi mjeku.

I pyetur lidhur me masat që po merren në Spanjë për të parandaluar përhapjen e koronavirusit, Sallabanda, tha se Spanja ka aplikuar një mbyllje selektive.

“Kemi filluar të kufizojmë daljet nga ora 10 e darkës, lokalet funskionojnë me 50% të kapaciteteve. Nëse do dalësh për një kafe duhet ta pish jashtë. Nëse ka një të sëmurë, ai izolohet totalisht, por Madridi nuk është i izoluar. Studentët e mi vijnë në mësim. Europa është mbyllur në formë selektive duke mbyllur ato vatra, që ne mendojmë se rrezikojnë”, tregoi ai.