Momentet e arrestimit të Kryeredaktorit të “Koha Jonë” Qamil Xhani

Ja pamjet e arrestimit të Kryeredaktorit të “Koha Jonë” Qamil Xhani te hyrja e gazetës, datë 11 dhjetor 2020.

Kryeredaktori ishte te dera e redaksisë  dhe ka dalë sapo kanë ardhur makina me sirena policie, të cilët po rrihnin dy minorenë. Në këtë moment ka ndërhyrë kryeredaktori duke u përpjekur t’i filmojë forcat speciale që po dhunonin minorenët, por e kanë prangosur menjëherë kryeredaktorin e KOHA JONË.

Ndërkohë që po i vinin prangat për ta futur në makinën e policisë, jo vetëm kryeredaktori që i ka sqaruar se jam gazetar, por edhe zv/kryeredaktori Herion Mesi u ka thënë se “është kryeredaktor i gazetës KOHA JONË”.

Forcat e policisë e kanë futur me dhunë në makinë kryeredaktorin e KOHA JONË duke e goditur në kokë dhe shpinë.

Më pas botuesi Nikoll Lesi ka telefonuar urgjent drejtorin e policisë së shtetit Ardi Veliut, të cilit ia ka sqaruar ngjarjen dhe i ka kërkuar llogari për këtë ndalim mu te dera e redaksisë së KOHA JONË.

Mësohet se celularin e kryeredaktorit policia e ka marrë dhe ka fshirë pamjet.

Kryeredaktori është mbajtur për 30 minuta në ambientet e komisariatit numër dy në Tiranë, se bashku me 50 protestues të tjerë që ishin ndaluar.

Në ambientet e komisariatit i është kërkuar të firmosë një deklaratë ku të pranonte se ishte ndaluar për “Pjesëmarrje në tubim të paligjshëm”, ndërkohë që arrestimi dhe prangosja e tij është bërë te dera e gazetës “Koha Jonë”.

Pas më shumë se një ore nga momenti i ndalimit kryeredaktori u la i lirë, ndërkohë që tha për redaksinë se “dola nga komisariati ku po kërciste druri mbi të ndaluarit”.