Muharrem Rama betohet në krye të Bashkisë së Dibrës

Muharrem Rama, i zgjedhuri nga qytetarët dibranë në zgjedhjet e 11 shtatorit, ka bërë sot betimin si kryetari i ri i Bashkisë së Dibrës. Në fjalën e tij, në ditën e parë të detyrës, Rama tha se do të bëjë disa ndryshime në institucion, duke filluar nga ndryshimet në administratë.

Sakaq ai ka folur edhe për qëndrimin e tij sa i takon koalicionit PS-LSI, duke u shprehur se do të vijojë në këtë linjë.

Muharrem Rama, kandidati i ASHE për Dibrën, fitoi me 4 mijë vota diferencë ndaj kandidatit të djathtë, Sherefedin Shehu. Votimet në Dibër u shoqëruam me akuza për blerje votash, si dhe nuk munguan fotografimet e fletës së votimit nga të dyja palët.

Rama zëvendëson në këtë post, Shukri Xhelilin, i cili u shkarkua pas publikimit të një videoskandali ku i kërkonte favore seksuale një vartëseje të tij në Bashki, në këmbim të një vendi më të mirë pune.