“N’do me hirë, n’do me pahirë”/Grupi Parlamentar i PD-së thirrje deputetëve për t’u paraqitur në seancë

Pavarësisht se Parlamenti i ka përjashtuar për 11 ditë 23 deputetë të opozitës, këta të fundit kanë vendosur të shkojnë në Parlament.

Seanca e radhës është parashikuar për ditën e hënë në orën 17:00, ndërsa grupi parlamentar i Partisë Demokratike ka vendosur që të gjithë deputetët të jenë të pranishëm dhe të mblidhen para ndërtesës së Parlamentit në orën 16:30 minuta për të shkuar siç thuhet në njoftim “në grup, në seancë”.

“N’do me hirë, n’do me pahirë”- është moto e tyre, të cilët bëjnë thirrje kryeministrit të mos i bllokojë, pasi përndryshe do të ketë përplasje fizike.

Për shkak të bllokimit të seancës së shkuar parlamentare, çka detyruan kryeparlamentare ta ndërpresë seancën pa miratuar ligjet, ata janë dënuar nga Byroja e Kuvendit që drejtohet nga PS. Midis deputetëve të përjashtuar janë edhe kreu i grupit parlamentar të PD, Gazment Bardhi si dhe ish-kryeministri Sali Berisha.

Bllokimi i seancës erdhi pas nisjes së aksionit të ri të opozitës kundër bllokimit nga ana e mazhorancës në pushtet të komisioneve hetimore dhe përfaqësimit të opozitës në Komisionin e Reformës Zgjedhore.

Nesër ata kanë vendosur të hyjnë në parlament edhe me forcë.

Ndërkohë militantët e PD do të jenë para parlamentit, aty ku zhvillohen seancat parlamentare, afër Xhamisë së Re.