”Në katër anët po bien sirenat e revoltës”, Berisha thirrje sindikatave për protesta të fuqishme

Gjatë takimit me përfaqësues të sindikatave në vend, kryetari i PD-së Sali Berisha tha se do të vendoset së shpejti për protestat, për të cilat tha se do të jenë të qëndrueshme deri në rrëzimin e qeverisë. Sipas Berishës, vetëm sindikatat mund të organizojnë protesta të fuqishme.

”Në katër anët po bien sirenat e revoltës. Në çdo takim dhe bisedë dëgjoj vetëm një kërkesë, protestë dhe vetëm protestë. E gjej nga të rinj, të moshuar, biznesmenë.

Ky takim është jashtëzakonisht i rëndësishëm sepse forma me fuqishme e protestës, siç ka provuar historia është ajo që strukturohet me sindikata. Do të keni mbështetjen e PD, opozitës në çdo përpjekje tuaj.

Le ti japim përgjigje ne shqiptarëve që sindikata është në këmbë, e gatshme dhe ju garantoj ju se PD do të jetë në mbështetjen tuaj totale. Do të jemi në protesta të qëndrueshme deri në rrëzimin e kësaj qeverie, në momentin më të përshtatshëm dhe të duhur që do të vendosim bashkërisht”.