Negociatat, Basha: Qeveria ka minuar, shkelur dhe abuzuar me procesin

Kreu i PD-së, Lulzim Basha, në një prononcim për ”The Irish Times”, rendit një sërë problemesh që mund t’i bëhen pengesë vendit në lidhje me negociatat e Integrimit në BE.  “Shqipëria është ndoshta vendi i parë në historinë moderne pa një Gjykatë të Lartë, pa një Gjykatë Kushtetuese, pa prokuror të përgjithshëm, me një Parlament me vende të paplotësuara, dhe me një kryeministër që qeveris me dekrete pa asnjë limit institucional për pushtetin e tij”, është shprehur Basha për mediat irlandeze.

Basha ka theksuar se demokratët i kanë dhënë mbështetje reformës në drejtësi por akuzon qeverinë se ka “minuar, shkelur dhe abuzuar” me procesin.

“Si rezultat kemi një gjyqësor të paralizuar dhe asnjë politikan apo figurë e krimit të organizuar nuk është përballur me drejtësinë. Përkundrazi, një numër i çështjeve të nivelit të lartë të korrupsionit janë anashkaluar nën ndikimin e qeverisë, duke siguruar pandëshkueshmëri për të akuzuarit”, ka thënë kreu i PD-së.