Negociatat/ Kryeministri Rama: Nesër thuhet fjala e fundit

Edhe pse Franca doli kundër zgjerimit të BE-së dhe për Shqipërinë përmendi azilantët si shqetësim kryesor, kryeministri Edi Rama theksoi mbrëmjen e sotme në emisionin “Open” se fjala e fundit për hapjen ose jo të negociatave të Shqipërisë me BE-në nuk është thënë akoma. Kreu i qeverisë pohoi se duhet të pritet të shihet vendimi nesër, pasi diskutimet në tryezën e Këshillit Europian vijojnë ende.

“Gjermania dhe një front i gjerë që mbron idenë se duhen çelur negociatat dhe nga ana tjetër Franca dhe dy a tre vende që mbrojnë idenë se nuk duhet vazhduar por duhet një qasje e re. Jemi në kushtet ku as Shqipërisë dhe as Maqedonisë së Veriut dhe as gjë nga ato që kemi bërë apo duhet të bëjmë akoma, nuk kanë asnjë lidhje me atë që po debatohet në tryezën e Këshillit Europian. Fjala e fundit akoma nuk është thënë. Diskutimi vazhdon intensivisht edhe pse qëndrimi i presidentit francez lë pak shpresë për të patur një dritë jeshile sonte. Të presim deri nesër për të kuptuar se ku realisht ndodhet procesi. Nuk ka një përfundim akoma”.