Nis nga njesi nr.5, shembja dhe rindërtimi i hapësirave publike

Bashkia e kryeqytetit do të nisë neser shembjen e ndërtimeve të jashtëligjshme dhe çlirimin e hapësirave publike duke filluar nga njesia nr.5, e administruar nga Jeta Seitaj.

Në njoftimin që ka shpërndarë për qytetarët, bashkia shprehet se bashkë me INUV dhe Policinë Bashkiake do të nisë  lirimin e hapësirave të zëna në mënyrë të paligjshme si dhe rehabilitimin e tyre, sipas urdhrit të lëshuar sot nga kryetari i Bashkisë, Erion Veliaj, ku përcaktohet edhe plani i punës.

Përmes një publikimi sot në mëngjes në rrjetin social “Twitter”, Veliaj ka kërkuar bashkëpunimin e të gjithë qytetarëve për aksionin. “Duke nisur nga dita e shtunë, datë 15 gusht 2015, Bashkia e Tiranës, në bashkëpunim me Inspektoratin Ndërtimor Urbanistik Vendor dhe Policinë Bashkiake, do të ndërmarrë një aksion për çlirimin e të gjitha hapësirave të zëna në mënyrë të paligjshme në Njësinë Administrative nr. 5 si dhe për rehabilitimin e tyre. Për këtë arsye, ju lutemi në bashkëpunimin tuaj. Na ndihmoni të mbajnë pastër qytetin dhe të krijojmë më shumë hapësira të gjelbra në Tiranën tonë”, shkruan Veliaj.