Nishani do të takohet me akademikët për ligjin në arsimin e lartë

Presidenti Bujar Nishani do të takohet ditën e hënë me akademikë dhe pedagogë për të diskutuar ligjin e arsimit të lartë, të miratuar vetëm me votat e mazhorancës. Mësohet se takimi konsultues do të zhvillohet në ambientet e presidencës.

Ligji për arsimin e lartë pas dikutimesh dhe debatesh të forta u miratua në orët e para të mëngjesit të së mërkurës me 78 vota pro të mazhorancës. Opozita e kundërshtoi ligjin, pasi sipas saj, rriten tarifat për studentët dhe shkatërrohet autonomia e universiteteve. Kryetari i PD-së, Lulzim Basha ka deklaruar se do ta dërgojë këtë ligj në Gjykatën Kushtetuese dhe i ka bërë thirje Presidentit të mos e dekretojë. Reforma gjithashtu është kundërshtuar nga akademikët dhe studentët.