Nishani përshëndet partneritetin strategjik SHBA-Shqipëri: Institucionet ta zbatojnë

Presidenti i Republikës, Bujar Nishani përshëndet nënshkrimin në Uashington të Deklaratës së Përbashkët për Partneritet Strategjik mes Republikës së Shqipërisë dhe Shteteve të Bashkuara të Amerikës dhe e konsideron atë një dokument shumë të rëndësishëm për forcimin e mëtejshëm të marrëdhënieve mes dy vendeve, intensifikimin e dialogut politik në të gjitha çështjet me interes strategjik si dhe një instrument inkurajues për paqen dhe sigurinë në rajonin e Ballkanit Perëndimor. Në njoftim nga zyra e shtypit të Presidentit thuhet: “Në emër të qytetarëve shqiptarë Presidenti Nishani shpreh mirënjohjen e thellë për mbështetjen e gjithanshme që Shtetet e Bashkuara i kanë dhënë Shqipërisë ndër vite për vendosjen e përpjekjet për konsolidimin e demokracisë dhe shtetit ligjor, për realizimin e aspiratës sonë evropiane si dhe për forcimin e rolit konstruktiv dhe stabilizues që Shqipëria ka luajtur dhe vazhdon të ketë në Ballkanin Perëndimor”.