Nishani pret Ivanov: Të rrisim bashkëpunimin ekonomik me Maqedoninë

Presidenti i Republikës, Bujar Nishani priti sot në Tiranë homologun e tij maqedonas, Gjorgje Ivanov, me të cilin ka rënë dakord mbi domosdoshmërinë e intensifikimit të marrëdhënieve dypalëshe.

Në një konferencë të përbashkët për shtyp në përfundim të takimit, Nishani ka nënvizuar se bashkëpunimi i mirë mes dy vendeve duhet të vazhdojë, duke qenë se ato ndajnë interesa të përbashkëta ekonomike dhe strategjike. “Për Shqipërinë, Maqedonia është një vend i rëndësishëm dhe mik, me të cilin ndajmë edhe marrëdhënie të shumëfishta, kulturore dhe ekonomike. Është me rëndësi që ky trend marrëdhëniesh të mira të vazhdojë”, theksoi Nishani.  Sipas kreut të shtetit, Tirana dhe Shkupi kanë konstatuar tashmë një seri fushash, përfshirë  atë të interesit strategjik, duke qenë se të dyja vendet synojnë anëtarësimin në BE. Në planin e integrimeve, Nishani ka nënvizuar se, anëtarësimi i Maqedonisë në NATO është në interes të sigurisë në rajon.  

Duke u ndalur tek marrëdhëniet ndëretnike në vendin fqinj, presidenti ka vlerësuar rolin “e rëndësishëm” të faktorit shqiptar atje, ndërsa ka bërë thirrje për më shumë maturi ndaj ngjarjeve që ndonëse të vogla nxisin tensione.   Nga ana tjetër, ai ka garantuar homologun Ivanov se do të garantohen të gjitha të drejtat që pakica maqedonase në Shqipëri të ruajë identitetin e saj kombëtar.   Nga ana e tij, Ivanov ka theksuar se bashkëpunimi mes dy vendeve duhet të intensifikohet në veçanti në aspektin ekonomik. Ai është shprehur optimist se investimet dypalëshe në infrastrukturë do të ndihmojnë në këtë drejtim.   – “Ne si dy shtete kemi një bashkëpunim të frytshëm, me takime të shpeshta dhe marrëdhënie shumë të mira. Besoj se do të arrijmë të rindërtojmë bashkëpunimin të mirë përmes mbajtjes së kësaj dinamike. Presidenti Nishani ka një ftesë për të vizituar Maqedoninë dhe ne i përkushtohemi intensifikimit të marrëdhënieve miqësore me Shqipërinë, por ka diçka për të cilën s’mund të jemi të kënaqur. Nga takimi shtetëror i kaluar, viti 2012, e deri më sot kemi një bashkëpunim ekonomik, por ai nuk mund të jetë në këtë nivel që është. Ndaj, marrëdhëniet e mira duhet të kthehen në një bashkëpunim ekonomik më të lartë. Besoj se investimet e mëdha në infrastrukturë do të ndikojnë edhe më shumë në bashkëpunimin tonë”, theksoi Ivanov.