Një ekip nga Brukseli në Tiranë për procesin ”screening”, do analizohen disa çështje

Pas çeljes së negociatave nga ana e Bashkimit Europian për Shqipërinë, javën e ardhshme do të nisë procesi “screening”. Një ekip nga Brukseli do të vijë në Tiranë.

Aty evidentohet se çfarë duhet plotësuar për të hapur dhe mbyllur grupkapitujt e negociatave në fusha specifike, që do të ndihmojë autoritetet shqiptare të përcaktojnë udhërrëfyesin për t’i plotësuar ato.

Gjatë “screening” KE-ja evidenton reforma prioritare kyçe anti-korrupsion dhe shqyrtohet kapaciteti administrativ. Grupkapitujt hapen dhe mbyllen me unanimitet nga 27 vendet anëtare.

Disa nga çështjet që do të diskutohen janë edhe ato për “pasaportat e arta”, projekt i qeverisë, si dhe “amnistia fiskale e penale”.

Komisioni Europian nuk është dakord për projektin e parë ndërkohë që amnistia po diskutohet nga ekspertë të huaj dhe Ministria e Drejtësisë dhe ajo e Financave. Vizita e dytë e ekipit të BE për procesin “screening” në Shqipëri do të jetë më 23 nëntor.

Procesi i “screening” është një vëzhgim i thellë i të gjitha fushave.