Noka akuza të rënda ndaj Bashës: As armiku më i madh nuk e kishte cilësuar “llum” bazën e PD

Deputeti i PD-së Flamur Noka, pas mbledhjes së grupit parlamentar, në një deklaratë për mediat lëshoi akuza të rënda ndaj Lulzim Bashës.

”Denoncoj leksikun e ulët të kryetarit të PD-së ndaj qeverisë së Partisë Demokratike, më e suksesshmja në 30 vitet e fundit. Denoncoj poshtërimin që Basha i bëri mbrëmë anëtarësisë dhe elektoratit të PD-së, duke e quajtur llum. Asnjë nuk ka guxuar, as Nano dhe as Rama, ta konsiderojë qeverinë e Sali Berishës dhe bazën e PD-së si llum, as armiqtë më të mëdhenj”.

Mbështetës i ”Foltores”, ai tha se nisma e Sali Berishës është “zgjidhja, alternativa, i vetmi shans për ta mbajtur këtë forcë të bashkuar”, duke pohuar se procesi i firmave po shkon në mënyrë të shkëlqyer, “sepse baza është qartësisht për një forcë të bashkuar”.