“Non-grata” nga SHBA dhe Britania, Berisha: Nëse del një fakt, unë lë politikën

Në takimin me intelektualët, Sali Berisha ka folur për shpalljen “non-grata” fillimisht nga SHBA dhe tani edhe nga Mbretëria e Bashkuar. Kreu i PD-së i ka sfiduar këto dy super shtete, duke thënë që nëse del një fakt i vetëm për të cilat akuzohet, ai do t’i thotë lamtumirë politikës.

“S’kisha menduar kurrë se do të sfidoja ndonjëherë sekretarin e SHBA, kurrë. Meqenëse ai kishte firmosur një akt në të cilën unë kisha bindjen absolute se nuk qëndronte asnjë fakt, dola dhe i thashë paraqit çdo fakt, përndryshe do të shkoj në gjykatë. Do shkoj në gjykatë se nuk ke, nuk mund të gjesh dhe s’do të gjesh kurrë asnjë fakt për mua dhe as për fëmijët e mi.

Unë kam qenë i këtij kodi dhe sot pas 15 muajsh më gjithë check up-in universal, se kam edhe unë miqtë e mi, kanë gjetur zero.

Unë vazhdoj të them, një fakt të vetëm po sollët unë i them mirupafshim politikës dhe çdo vendim tjetër. Të pranoj një të pavërtetë për të vërtetë, kurrë. E ka thënë Galileo dhe s’mund ta bëjë njeriu i qytetëruar kurrë”.