Opozita kërkon lider të ri

Nga Daniel Muçaku-

Opozita pësoi një humbje të rëndë në këto zgjedhje vendore. PS fitoj 53 bashki dhe koalicioni BF i Meta-Berisha vetëm 7 bashki.

PD zyrtare e drejtuar nga Enkelejd Alibeaj u turpërua me rezultatin që mori, aq sa Alibeaj dha dorëheqjen. E teksa pritej e njëjta gjë nga Berisha ai kundërshtoi rezultatin duke u shprehur se janë vjedhur votat. Madje përkundrazi u bën thirrje mbështetësve të tyre për protesta. Por kush i vjen më në protesta?! Ai duhej të krijonte frymë përbashkimi, por nuk arriti dot ta bënte. Ndaj njeriu kur dështon ikën.

Të dy liderët si Berisha dhe Meta para datës 14 maj u zotuan se nuk ka asnjë mundësi që vota e opozitarëve të tjetërsohej, pra se nuk do blihej, por gabimi i tyre ishte se premtuan diçka që nuk mund ta mbronin dot.

Tashmë ndodhemi në një vend ku nuk ka opozitë serioze dhe të besueshme, kurse qeveria nga ana tjetër miraton tendera miliona euro e nuk ka përfaqësues nga opozita që ti denoncojë. Demokratët janë ata që vuajnë edhe pse shumica janë larguar në vendet europiane, disa me gomone e disa me avionë.

Kjo opozitë e shtypur brenda dhe e izoluar jashtë, nuk mund ta kalojë me të qara atë që ndodhi. Ajo nuk asnjë shans për të marrë një mandat qeverisës për zgjedhjet e 2025.

Për të dalë nga ky ngërç disavjeçar duhet një lider i ri, përbashkues nga të dyja palët e ndara të PD, që të krijoj besim te populli se është një alternative që duhet mbështetur.

E ndaj themi që cikli i Berishës ka përfunduar.

Lideri i ri i PD-së mund të vijë nga shoqëria civile, nga brenda Partisë Demokratike ose nga fusha e biznesit dhe medias.

Por duhet lider i ri! Nuk mposhtet Edi Rama me 500 mijë votat që mori opozita. Natyrisht që Berisha mori shumë në kushtet që shkoi situata para votimeve, porse nuk mund të ketë justifikim nëse synon të kthesh demokratët në pushtet.

Duhen mbi 800 mijë vota që të rrëzohet Edi Rama.

Po ashtu ndërkombëtarët janë një tjetër faktor tepër i rëndësishëm, nga ku sot PD e Berishës është bllokuar nga të 4 anët e ndaj nuk bëhet edhe rrotacioni.

Një lider dhe figurë e re është shpëtimi i PD historike. Ndaj duhet të bëhet një platformë bashkëpunimi. As Berisha, as Basha nuk duhet të drejtojnë, pasi kështu kryeministri Edi Rama do të qeverisë për shumë gjatë.

Sali Berisha të bëjë një hap pas, të hapi partinë, të mirëpresi ata që në fillim u ulën tavolinave të foltoreve të tij, të futen në parti njerëz të lirë që dinë të kundërshtojnë, që mund të artikulojnë dhe të mbrojnë mendim ndryshe nga ai i liderit, njerëz me personalitet.

Vetëm kështu opozita mund të jetë një alternativë dhe një forcë konkuruese dhe të rikthehet në pushtet.

Një përbashkim dhe hapje e PD, një lider i ri që motivon edhe pjesën gri të popullsisë; vetëm kështu mund të vijnë demokratët në pushtet.