Ornaldo Rakipi flet në Kuvend: Ndryshe nga babai im, Basha nuk është burrë! Do apelojmë vendimin e DASH

Djali i ish-deputetit të PS-së Aqif Rakipi, ndaj të cilit Departamenti Amerikan i Shtetit ka vënë sanksione, në fjalën në Kuvend pasi është deputet, Ornaldo Rakipi tha se ndryshe nga babai i tij, Lulzim Basha nuk është burrë.

”Dua të sqaroj qytetarët sa i përket aktit të DASH, im atë po ndërrmet çdo hap për të marrë drejtësi. Vlerësojmë ambasadën amerikane, por vendimi i tyre lë mundësi apelimi. Kam një fjalë për Lulzim Bashës, mos mallko suksesin tjetër, por politika është takime me njerëzit, prandaj ke dështuar se nuk arritje që të marrësh besimin e njerëzve se je fals dhe je materialist. Babi im bëhet copash për të ndihmuar një njeri në nevojë, babai im ndryshe nga ti ka burrni. Sa për akuzat ju ftoj ju, mediat, të hetojnë aktivitetin tim, që nga momenti i angazhimit deri tani, nuk do humb asnjë sekondë, do e justifikojë besimin e shqiptarëve”.

Fjala e plotë nga Ornaldo Rakipi

E nderuar Kryetare e Kuvendit, të nderuar kolegë. Të dashur qytetarë që po na ndiqni. Unë jam votuar dhe kam marrë besimin e mijëra qytetarëve të qarkut të Tiranës, për t’i përfaqësuar dhe për të qënë zëri i shqetësimeve dhe halleve të tyre. Nuk ka detyrim më të madh për mua se sa ky. Dhe kam ndërmend që me gjithë fuqinë time, ta justifikoj këtë besim kaq bujar.

Po sot, jo për zgjedhjen time, më duhet të them dy fjalë për babain tim. Dua të sqaroj fillimisht qytetarët, votuesit e mi, se sa i takon aktit të Departamentit të Thesarit, im atë po ndërmerr çdo hap institucional dhe ligjor, për të çuar në vend këtë padrejtësi. Ne sigurisht e vlerësojmë administratën amerikane, dhe vendimi i tyre e ka dhënë vetë mundësinë e apelimit. Procedurë që tashmë është në rrugë e sipër.

Aqif Rakipi është përmendur dhe përgojuar shpesh kohët e fundit, sidomos nga Lulzim Basha dhe ndonjë njeri i afërt me të. Është demonizuar pa të drejtë dhe është hedhur shumë baltë mbi të. Kam një fjalë për Lulzim Bashën. Mos mallko suksesin e tjetrit, por mëso se në thelb politika është marrdhënia me njerëzit. Dhe pikërisht kjo është arsyeja e dështimit tënd serial, është kjo arsyeja pse ti, edhe pse të janë dhënë shanset më të mëdha që i janë dhënë dikujt në këto 30 vite, nuk arrite të fitosh zemrat dhe besimin e njerëzve.

Sepse në thelb je fallso, dhe sheh vetëm interesin tënd egoist e material. Suksesi vjen kur i konsideron njerëzit, i takon, i sheh në sy, u qan hallet, dhe përpiqesh për ta. Kur u gjendesh atyre në ditë të vështira. Kur gjejnë tek t’i mbështetje kur kanë një problem, kur përplasen në dyert e spitaleve, kur përplasen me arrogancën e institucioneve, kur nuk i dëgjon kush. Babai im bëhet copash për të ndihmuar çdo njeri në nevojë. Ndryshe, po shumë ndryshe nga ti, babai im ka një cilësi që shqiptarët e duan, që quhet burrni.

Është kjo arsyeja pse ai është votuar. Eshtë kjo arsyeja pse unë kam marrë mbështetje. Kjo është vlerë dhe në këtë pikë do të mundohem me gjithë forcën time të ndjek këtë rrugë. Me njerëzit për njerëzit.

Sa për akuzat, unë ju ftoj ju, median dhe çdo njeri që është sot i shqetësuar, të hetojë, të hulumtojë çdo ditë të aktivitetit tim, që prej momentit të parë të angazhimit, deri sot dhe në vijim. Por qytetarët, njerëzit i dinë mirë këto. Dhe nuk do të humb më asnjë sekondë me politikën e keqe të gojëve të liga. Jam këtu për të shërbyer e për të justifikuar besimin që më është dhënë nga rreth 16 mijë qytetarë. Këtë do të bëj çdo ditë të angazhimit tim në politikë.