OSBE: Ndërmerrni hapa të bashkërenduar për përfshirjen e minoriteteve

Prezenca e OSBE­së bëri thirrje për hapa të bashkërenduara për përfshirjen e minoriteteve.

Në konferencën vjetore të Avokatit të Popullit, Zëvendës Kryetari i Prezencës së OSBE­së në Shqipëri, Robert Wilton, bëri thirrje për përpjekje të bashkërenduara për të përmirësuar mbrojtjen dhe promovimin e të drejtave të minoriteteve në Shqipëri. Ai vuri theksin te Raporti i Veçantë i Avokatit të Popullit për Minoritetet, si një kontribut i rëndësishëm për të përmirësuar përfshirjen e minoriteteve në Shqipëri, në dritën e dialogut të gjerë që tashmë ka nisur.

“Ne të gjithë e kemi parë se çfarë mund të ndodhë kur identiteti i minoriteteve përdoret për përçarje dhe diskriminim.

Përkundrazi, mbrojtja e të drejtave të njeriut dhe integrimi kuptimplotë i minoriteteve janë faktorë që ndihmojnë në ndërtimin e shoqërive demokratike, të qëndrueshme dhe plot jetë. Është e mundur që të respektohet dhe kremtohet identiteti i minoriteteve dhe në të njëjtën kohë, të bëhet pjesë e një shteti të fuqishëm e të qëndrueshëm; kjo është e mundur dhe pozitive”, u shpreh Wilton.

OSBE-­ja, përmes Prezencës në Shqipëri dhe institucionit të Komisionerit të Lartë për Pakicat Kombëtare, ka mirëpritur hapat e Shqipërisë në drejtim të konsolidimit të stabilitetit në rajon dhe të kohezionit në vend.

Në këtë kontekst, ngritja e një grupi pune ndërinstitucional për të vlerësuar kuadrin ligjor dhe politikat për minoritetet është një zhvillim pozitiv.