Papa kritika Europës: Emigrantët po i përdorni për propagandë politike

Papa Françesku në një vizitë zyrtare në Greqi, ka thënë se vendet Europiane po neglizhojnë emigrantët. Ai ka denoncuar sesi këto vende po i trajtojnë emigrantët, duke thënë se vendosin përpara interesit të tyre vetjak.

Teksa takoi dhjetëra azilkërkues në Lesbos, Papa tha se ata po përdoreshin për propagandë politike. Ai kritikoi edhe muret e ngritura nga Polonia dhe Hungaria për ndalimin e emigrantëve.

“Në Evropë ka nga ata që këmbëngulin ta trajtojnë problemin si një çështje që nuk i shqetëson ata, kjo është tragjike. Historia na mëson se interesi i ngushtë vetjak dhe nacionalizmi çojnë në pasoja katastrofike. Është e lehtë të ndikosh në opinionin publik duke futur frikën ndaj tjetrit. Duhen sulmuar shkaqet e largëta, jo njerëzit e varfër që paguajnë pasojat dhe madje përdoren për propagandë politike”, tha Papa.