PD: Fabrika e kokainës dhe seriali i tritolit, çdo shqiptar i pasigurtë

Sekretari i Përgjithshëm i Partisë Demokratike, reagoi sot publikisht ndaj atentateve me shpërthim, duke i cilësuar ato si  të lidhura me largimin e Policisë së Shtetit nga detyra e saj kryesore që është rendi dhe siguria publike.

Sipas tij, informacionet më të reja dëshmojnë për depërtimin e lidhjeve të trafikantëve të kokainës deri në nivelet më të larta të politikës dhe policisë

“Rikthimi i atentateve me tritol, është një dëshmi tronditëse e faktit se Edi Rama dhe ministri i tij vazhdojnë të ndjekin kursin e mbajtjes së Policisë larg detyrës së saj themelore, që është rendi dhe siguria publike.

Shpërthimet e njëpasnjëshme kanë krijuar panik tek qytetarët, ndërkohë që Policia vazhdon të mburret cdo ditë me arrestimet e fukarenjve që nuk kanë lekë të paguajnë energjinë.

Vetë fushata represive për energjinë, ndërkohë është selektive, debitorët e mëdhenj me 205 milionë janë në pushtet, ndërsa të pamundurit po mbushin qelitë.

Largimi i policisë nga detyra e saj themelore, rendi dhe siguria, u pa qartë edhe në rastin e instalimit të fabrikës së Kokainës në zemër të Shqipërisë dhe ngritjes së atij rrjeti të rrezikshëm criminal”, deklaroi Ristani.