PD i përgjigjet Ramës dhe publikon videon: Nuk mund të tallesh me jetën dhe shëndetin e shqiptarëve

Sekretari i përgjithshëm i PD, Gazment Bardhi i është përgjigjur kryeministrit Edi Rama sa i takon situatës shëndetësore në vend, të krijuar nga koronavirusi.

Ndërsa publikon edhe një video, Bardhi thotë se Rama nuk mund të tallet me jetën dhe shëndetin e shqiptarëve.

Si reagim për videon e publikuar nga Rama me pamje nga spitali Covid 3, Bardhi tha se kryeministri duhet t’i japë përgjigje disa pyetjeve.

“Edi Rama është simboli i papërgjegjshmërisë, i paaftësisë, i mungesës së ndjeshmërisë njerëzore. Sa bosh mund ta ketë shpirtin një kryeministër që u tregon qytetarëve krevatet bosh tek Covid 3, kur njerëzit dergjen me orë të tëra në ambulanca, në pritje të lirimit të vendeve tek infektivi?

Edi Rama sot ka për detyrë të mos harxhojë kohë me video të pavlera, por t’u japë përgjigje disa pyetjeve të thjeshta:

🔴 Pse qëndrojnë me orë në ambulancë përpara spitalit pacientët në pritje të shtrimit në Spitalin Infektiv?

🔴 Pse shumica e pacientëve janë lënë në mëshirë të fatit dhe pa mjekim nga shteti nëpër shtëpitë e tyre?

🔴 Pse nuk shtrohen pacientët në COVID 3 dhe pse nuk hapet COVID 4, kur qeveria thotë se është gati?

Edi Rama nuk mund të tallet me jetën dhe shëndetin e shqiptarëve. Është çnjerëzore të bësh propagandë në këtë situatë dhe të luash politikisht me shëndetin e qytetarëve. Trajtimi në kohë i pacientëve është jetik për shëndetin e tyre.

Edi Rama, mesazhi që njerëzit japin çdo ditë për ty është se ti je një kryeministër i papërgjegjshëm dhe i paaftë! Realiteti sot është ai i njerëzve që marrin oksigjen në ambulanca dhe jo shtretërit 3D, siç mashtron Rama”, shkruan Bardhi.