PD: Kullën te aneksi i “Qemal Stafës” Rama ia dha Hakmarrjes për Drejtësi dhe Shullazit

Politikë E Mërkurë, 21 Prill 2021 00:13

Partia Demokratike vendosi më në fund të bëjë publik emrin e “bandës” që ajo tha dy ditë më parë se do të ndërtojë një kullë në aneksin e stadiumit “Qemal Stafa”. PD tha sot se leja i është dhënë Hakmarrjes për Drejtësi. Por sipas saj, në këtë projekt Rama ka bërë bashkë “Hakmarrjen” me Shullazin.

“Edi Rama po fsheh planin e tij, për të kthyer në pallat fushën tek aneksi i Stadiumit Qemal Stafa, për të ndërtuar një kullë betoni ku besohet se kumbari ka bashkuar interesat e dy bandave të tij të preferuara. Të Shullazit dhe Hakmarrjes për Drejtësi. Ne e denoncuam dy ditë më parë këtë projekt kriminal të Edi Ramës. Ai heshti. Heshti, sepse ai është arkitekti i zhdukjes së kësaj hapësire, i kthimit të saj në një masiv betoni për interesat e tij dhe të bandave të tij”, thuhet në deklaratën e sotme të Partisë Demokratike.

Në denoncimin e dy ditëve më parë PD theksoi se nga administrata Basha në Bashkinë e Tiranës, kjo sipërfaqe ishte vendosur të lihej hapësirë publike. Por me marrjen e bashkisë nga Erion Veliaj, Rama ka vendosur ta japë për ndërtimin e një pallati shumëkatësh, duke e betonizuar edhe këtë pjesë.

Deklarata bombë

Kreu i Departamentit të Rendit dhe Sigurisë në Partinë Demokratike, Enkeled Alibeaj, ka bërë një deklaratë të fortë sot duke denoncuar një ndërtim që sipas tij i është dhënë në kundërshtim me ligjin dy prej bandave më famëkeqe kriminale, asaj të Emiliano Shullazit dhe Hakmarrjes për Drejtësi.

Bëhet fjalë për një kullë të lartë, që sipas Alibeajt, kryeministri Rama ka dhën miratimin që të ndërtohet mbi aneksin e stadiumit Qemal Stafa.

PD e denoncoi edhe dje një fakt të tillë pa përmendur emra konkretë, por sot, Alibeaj ka deklaruar se kulla i është dhënë për ndërtim dy grupimeve kriminale të lartpërmendura. Më poshtë deklarata e plotë e PD:

Të Shullazit dhe Hakmarrjes për Drejtësi.

Ne e denoncuam dy ditë më parë këtë projekt kriminal të Edi Ramës.

Ai heshti.

Heshti, sepse ai është arkitekti i zhdukjes së kësaj hapësire, i kthimit të saj në një masiv betoni për interesat e tij dhe të bandave të tij.

Kjo fushë që shihni në ekran, ishte parashikuar të bëhej lulishte dhe ishte përfunduar projekti i saj nga bashkia e drejtuar nga z.Basha.

Një projekt që është hedhur poshtë tashmë dhe ku pritet të mbillet nga Edi Rama pallati i bandave.

Edi Rama vazhdon kështu pa u ndalur në trajtimin e Tiranës si plaçkë, në ndarjen e trojeve më të çmuara të qytetit për klientët dhe banditët e tij.

Qytetarët e Tiranës nuk mund të lejojnë që Edi Rama t’u marrë fushat, hapësirat, liqenin, parkun, stadiumin, për të ushqyer bandat dhe klientelën e tij.

Eshtë koha e një bashkimi të fuqishëm kundër këtij sundimi kriminal”.