PD lë komisionet: Meta të iki! Xhafaj: Mos flisni para drejtësisë

Opozita ka vijuar sërish lojën e saj. Të shkoj në komisionet parlamentare, të kërkoj largimin e kreut të Kuvendit edhe të largohet. Edhe këtë të mërkurë axhenda e komisioneve parlamentare është bojkotuar nga deputetët e opozitës. Në Komisionin e Ligjeve deputeti i Partisë Demokratike Arben Ristani tha se nuk mund të vijojë axhenda normale e diskutimit të projektligjeve në komisione, në kushtet kur sipas tyre kreu i Kuvendit Ilir Meta është i përfshirë në planin për vrasjen e dy deputetëve, Tom Doshit të përjashtuar nga PS dhe deputetit demokrat Mhill Fufi. Deputeti demokrat Arben Ristani tha: “Ju e dini qëndrimin tonë, axhenda nuk mund të vijojë pa dorëheqjen e Metës. Kryetari i Kuvendit akuzohet për vrasje. Bashkohuni me ne dhe ju thërritini logjikës”, ndërsa kreu i komisionit Fatmir Xhafaj ju kundërpërgjigj duke thënë se: “Kjo është absurde, të flasë drejtësia pastaj ju”. Edhe në komisionin e Politikave të Jashtme opozita nuk ishte e pranishme qe nga nisja e mbledhjes. Ndërkohe gjatë seancës dëgjimore me ministrin e Punëve të Jashtme Ditmir Bushati, komisionit i është bashkuar Shpëtim Idrizi i Partisë për Drejtësi Integrim dhe Unitet, në koalicionin opozitar.