PD mbron Kreshnik Spahiun: Arrestimi i tij, politik

Ndalimi i kryetarit të Aleancës Kuq e Zi, Kreshnik Spahiu pas bllokimit të hyrjeve të Bashkisë së Tiranës në shenjë proteste nga mbështetës të kësaj partie, ka sjellë edhe reagimin e Partisë Demokratike.

Edhe pse PD-ja në të kaluarën e ka sulmuar Aleancën Kuq e Zi dhe kreun e saj, këtë herë selia blu duket se i ka shkrirë akujt dhe ka marrë në mbrojtje drejtuesin e AK-së.

Ish-minsitri i brendshëm i PD, Flamur Noka, tha në një deklaratë për mediat se veprimi i sotëm ëhstë tregues i rrëzimit të shtetit ligjor.

“Sot shteti ligjor ka rënë. Dita e shtetit ligjor nuk ekziston më. Të arrestosh për protestë do të thotë se po kthen kohën e diktaturës. Arrestohet kreu i një partie në zyrë si të ishte kriminel, ndërkohë që trafikantë vrasës hanë e pinë me qeveritarët. Nuk besoj që të jetë arrestuar qoftë edhe një kriminel në tre vite. Kjo është çmenduri, nuk mund të ndodhë në një shtet demokratik”, tha Noka.