PD: Organizata e drogës financoi fushatën e PS

Sekretari i Përgjithshëm i Partisë Demkratike, Arben Ristani doli në një konferencë për shtyp në lidhje me aksionin anti- drogë të policisë.

Pas arrestimit të një grupi ndërkombëtar të trafikut të drogës, kryeministri Edi Rama shkroi se opozita është e mërzitur.

“Opozita nuk është e mërzitur, por është thellësisht e shqetësuar, e tronditur, si gjithë qytetarët e vendit nga fakti se me ardhjen e Edi Ramës në pushtet, Shqipëria po kthehet në një Kolumbi të Europës ashti siç për fat të keq kanë lajmëruar edhe mediat europiane,” tha Ristani.

Sipas tij, aktivitetin e kanë konstatuar policitë partnere.

“Ne jemi të shqetësuar se një sipërmarrje kriminale e prodhimit dhe trafikimit të kokainës arrin të instalohet në Shqipëri e të ushtrojë aktivitet e qetë, derisa e konstatuan policitë partnere europiane. Ndërtimi i një fabrike droge të prodhimit e përpunimit të kokainës, disa kilometra larg Tiranës, është një fakt tronditës i dështimit të qeverisë në luftën kundër narko-trafikut.

Nuk mund të ndodhë, nuk ka asnjë shans të ndodhë një aktivitet i këtyre përmasave dhe kaq i organizuar, nëse Qeveria do të ishte në krye të detyrës duke kontrolluar territorin e duke luftuar trafikun e drogës. Fabrika e kokainës hedh poshtë gjithë mashtrimet për suksese imagjinare të Ministrit të Brendshëm, i cili pak ditë më parë mburrej se Shqipëria nuk ishte më vend i prodhimit të drogës,” tha Ristani.

Sipas tij, banda e arrestuar ka lidhje me qeverinë.

“Çdo orë po dalin të dhëna dhe fakte tronditëse për përfshirjen në këtë organizatë të njerëzve të lidhur me pushtetin.

Ne po e pyesim sot Edi Ramën, a kanë lidhje me këtë organizatë kriminale të afërm të funksionarëve të lartë të qeverisë?

A kanë lidhje me këtë organizatë kriminale, financues të fushatës së Partisë Socialiste në zgjedhjet e fundit?”