PD: Rama nuk i ka bërë mirë llogaritë me tropojanët
“Edi Rama nuk i ka bërë llogaritë mirë me qytetarët dhe sidomos me qytetarët e Tropojës që po i dhunon duke i larguar nga puna, dhe duke futur edhe persona me precedent penal.
Policia e shtetit dhunon të drejtat dhe liritë themelore të njerëzve duke i mbajtur në dhomat e izolimit vetëm për një arsye sepse këta janë mbështetës së Partisë Demokratike”.
Kështu u shpreh drejtuesi i Departamentit për të Drejtat e Njeriut në PD , Ervin Salianji gjatë një proteste në Tropojë me banorë të zonës.
Banorë të Tropojës kanë protestuar për situatën ekonomike, por edhe për atë që ata e kanë quajtur ndërprerje arbitrare të energjisë elektrike.
Ndërsa qytetarë të ndryshëm kanë deklaruar problemet e tyre të ndryshme si problemet me ndërprerjen e energjisë, apo pensionet, deputeti i PD, Besnik Duzha deklaroi se Tropoja është në ditët më te zeza që ka kaluar ndonjëherë.
“Qindra familje janë larguar nga skema e ndihmës ekonomike me pretekste qesharake se ka një televizor apo një frigorifer në shtëpi.
Shumë pensionistë e u është bllokuar apo heq pensioni me arsyen se gjoja do t’u verifikohet, kur ka pensionistë që kanë dalë prej 20 vitesh në pension.
Asnjë investim nuk ka në Tropojë dhe e gjej momentin ti bëj thirrje Edi Ramës që të heqë zullumin nga Tropoja, të largojnë forcat e policisë.
Të merret me nevojat e Tropojës, me hallet e Tropojës sepse Tropoja është në ditët më te zeza që ka kaluar ndonjëherë”, tha deputeti i Partisë Demokratike, Besnik Duzha.
