Përballë Këlliçit? Erion Veliaj: Unë debat me gishta nuk bëj dot, por me njerëz!

Kryebashkiaku dhe kandidati i PS-së, Erion Veliaj deklaroi se ndihet krenar për Tiranën e sotme e cila prodhon 60 përqind të ekonomisë së vendit. Në emisionin ”Opinion”, Veliaj tha se qyteti pas përgjumjes 4-vjeçare të drejtimit nga PD, ka një boom të zhvillimit. I pyetur për një debat të mundshëm me rivalin e tij politik në këtë garë elektorale Belind Këlliçi, ai u shpreh kundër. Kjo sipas Veliajt sepse Këlliçi përfaqëson një njeri të shpallur non-grata dhe një forcë politike pa vulë, emër apo fytyrë.

“Unë jam sot shumë krenar për privilegjin dhe mundësinë që kam pasur të drejtoj Tiranën me një skuadër fantastike dhe mënyra si kemi konceptuar edhe panelin sot, patjetër unë si titullari politik, të jap llogari dhe të shpalos vizionin por sot Tirana është kryeqyteti evropian i Sporteve, vjet ka qenë Kryeqyteti Evropian i Rinisë.

Sot më në fund kemi një Tiranë e cila nuk është fundi i botës, nuk është kryeqyteti i Koresë së Veriut të Evropës. Është një qytet që sot ka vërtet reputacion. Po të shikoni edhe ekon dhe jehonën që ka ardhur nga shumë aktivitete të ndryshme si Samiti i Bashkimit Evropian, siç mund të kenë qenë këto tituj për Tiranën. Vitin tjetër Tirana do jetë Presidenca e B40, Forumit më të madh të qyteteve të Ballkanit Jugor, një organizatë që e kemi bashkëthemeluar.

Qyteti ka pasur edhe përgjumje të madhe, ka pasur edhe vite ku nuk u ndërtua asnjë shkollë, kopsht, çerdhe. Sot jam krenar për këtë gjë që kemi bërë ne dhe për këtë rrugëtim të Tiranës që ka reputacion, që ka më shumë turizëm. Sot Tirana ka mbi 60 % të ekonomisë së vendit dhe sot Tirana ka pësuar një boom të zhvillimit dhe sot është lokomotiva që tërheq gjithë Shqipërinë përpara”, tha Veliaj.