Përfundon takimi i Ambasadores Yuri Kim me Presidentin Meta

Më shumë se 1 orë e 50 minuta ka zgjatur takimi në Presidencë, mes Ambasadores së SHBA-së në Tiranë, Yuri Kim me Presidentin e Shqipërisë, Ilir Meta.

Takimi vjen një ditë pasi ambasadorja Kim dhe 4 ambasadorë të tjerë u takuan me kryeministrin Edi Rama, ku në qendër të bisedës së tyre ishte nisma e opozitës parlamentare e mbështetur nga shumica socialiste për hapjen e listave.

Zyrtarja e SHBA-së dhe kreu i shtetit biseduan pak orë para mbledhjes së Këshillit Politik të thirrur nga mazhoranca, pas firmosjes së marrëveshjes me opozitën parlamentare.

Në marrëveshjen e firmosur mbrëmjen e së martës mes mazhorancës dhe opozitës parlamentare, u ra dakord që marrëveshja e 5 qershorit për Reformën Zgjedhore të votohet në seancën plenare më 23 korrik, ndërsa një javë më pas edhe ndryshimet kushtetuese.