Përgjimet nga policia/Komiteti Shqiptar i Helsinkit: Rrezikojnë të drejtën për privatësi

SPAK, Prokuroria e Përgjithshme, juristët dhe opozita kanë dalë kundër projektligjit që i jep të drejtë Policisë së Shtetit për të përgjuar. Tani edhe Komiteti Shqiptar i Helsinkit del kundër, ku thotë se ndryshimet e propozuara rrezikojnë të drejtën për privatësi.

”Në këtë projektligj parashikohen përgjime të shtetasve me vendim nga titullarët e strukturave të policisë vendore, pa autorizimin e organit procedues (gjykatës/prokurorisë) si dhe parashikohet ngritja e Komitetit Kombëtar të Politikave për Parandalimin dhe Luftën kundër Krimit të Organizuar që kryesohet nga Ministri i Brendshëm. Gjithashtu, KShH bashkararisht me 21 organizata të shoqërisë civile ka reaguar më herët, më datë 14 Shkurt të këtij viti edhe për projektligjin e kundërshtuar së fundmi nga Spak dhe Prokurori i Përgjithshëm. Në këtë reagim, organizatat e shoqërisë civile shprehin shqetësimin duke argumentuar se ndryshimet e propozuara në ligjin për policinë e shtetit dobësojnë pavarësinë e gjyqësorit dhe rrezikojnë të drejtën për privatësi. KShH përshëndet reagimin e Prokurorit të Përgjithshëm dhe Prokurorisë së Posaçme lidhur me ndryshimet në ligjin për policinë e shtetit, duke i vlerësuar të bazuara dhe të argumentuara objeksionet e paraqitura nga këto institucione të rëndësishme kushtetuese të pavarura”.

Nga ana tjetër, Komiteti Shqiptar i Helsinkit u tërheq vëmendjen Prokurorit të Përgjithshëm dhe SPAK-ut, për faktin se nuk reaguan kur u miratua anti normativ akti-KÇK, i cili në nenin 8 sanksiononte edhe ngritjen e Komitetit Kombëtar të Koordinimit për Parandalimin dhe Luftën Kundër Krimit të Organizuar, që në përbërje ka edhe Arben Krajën dhe Olsian Çelën.