Përplasjet për “Kushtetuesen”, delegacioni i Komisionit të Venecias zbarkon në Tiranë. Axhenda

Përplasjet mes mazhorancës dhe presidentit Ilir Meta lidhur me emërimin e anëtarëve të Gjykatës Kushtetuese do të sjellin sot në Tiranë një delegacion të Komisionit të Venecias. Ata do të priten nga kryeparlamentari Gramoz Ruçi, ndërsa do të takohen më pas edhe me kreun e shtetit Ilir Meta, anëtarët e Komisonit Hetimor për shkarkimin e tij, si dhe gjyqtaren Arta Vorpsi, e cila ishte edhe “molla e sherrit” mes presidencës dhe mazhorancës, pas të cilës Kuvendi miratoi një sërë ndryshimesh ligjore që shmangin bllokimin e betimit të magjistratëve nga presidenti.

Ndërkohë ditën e nesërme, delegacioni do të vijojë takimet me kreun e KED, Ardian Dvorani, të cilin Meta e ka paditur duke e akuzuar për shpërdorim detyre dhe përvetësim të titullit, padi e cila tashmë është në dorën e SPAK.

Axhenda e plotë

13 shkurt
Sot ne 9:30 delegacioni i Venecias takon Ruçin.
Në orën 12:00 delegacioni i Komisionit të Venecias takon Presidentin Ilir Meta.
Ne orën 10:40 delegacioni i Komisionit të Venecias takon anëtarët e Komisionit Parlamentar Hetimor
Ne orën 16:00 delegacioni i Komisionit të Venecias takon Arta Vorpsin

14 shkurt
Në orën 10: 15 delegacioni i Komisionit të Venecias takon Ardian Dvoranin, kreu i KED.