Pezullimi i Titujve të Pronësisë, Manjani: Ballakumja anti-kushtetuese e radhës

Në një reagim pas vendimit të qeverisë për të pezulluar përkohësisht dhënien e Titujve të Pronësisë mbi tokën, ish-ministri i Drejtësisë Ylli Manjani shkruan se po shkelet ligji. Këtë e demostron me faktin se dhënien e Titujve Pronësie e ka bërë kuvendi me ligj të posaçëm. ”Asnjë rrjesht i atyre ligjeve nuk lejon qeverinë të pezullojë dhënie titujsh! Asnjë! Pezullimi ndodh vetëm si masë procedurale e përkohshme përgjatë një procedure hetimore (penale apo administrative). Por jo si e drejte e qeverisë! Qeveria nëse çmon se duhen pezulluar ato ligje, duhet të propozojë ndryshimin e tyre në Parlament, por jo të anashkalojë zbatimin!”,-shkruan Manjani.

Statusi i plotë

Antikushtetushmëria e qeverisë vijon! Është bërë rutinë.

Më datë 13 mars 2018, nuk dihet saktë se ku (në Tiranë, Elbasan apo rrugës), qeveria ka vendosur të pezullojë përkohësisht dhënien e Titujve të Pronësisë mbi tokën.

Që të kuptojmë problemin: dhënien e Titujtve Pronësisë në Republikën e Shqipërisë e ka bërë Parlamenti me ligje të posaçme. Asnjë rrjesht i atyre ligjeve nuk lejon qeverinë të pezullojë dhënie titujsh! Asnjë!

Pezullimi ndodh vetëm si masë procedurale e përkohshme përgjatë një procedure hetimore (penale apo administrative). Por jo si e drejte e qeverisë! Qeveria nëse çmon se duhen pezulluar ato ligje, duhet të propozojë ndryshimin e tyre në Parlament, por jo të anashkalojë zbatimin!

Misioni Kushtetues u Qeverisë është të zbatojë ligjet e shtetit dhe jo të pezullojë zbatimin e tyre! Për më tepër e drejta e pronës është e drejtë themelore që rregullohet direkt nga Kushtetuta!

Duke pezulluar të drejtën që e fiton shtetasi nga vetë Kushtetuta, qeveria dhunon direkt Kushtetutën!  Jo vepër, por kryevepër penale e qeverisë, quhet kjo gjë! Nuk po merrem këtu fare me argumentat e tjera të natyrës politike, si premtimi për të mbyllur shpërndarjen e titujve. Nuk ja vlen kjo gjë se ska më as turp e as fytyre politike kjo qeveri! Por, përgjegjësinë ligjore ndaj dhunimit të të drejtave kushtetuese të shtetasve, të paktën duhet ta evidentojmë.

Në kushte normale Instirucionet e ndjekjes penale duhet të veprojnë. Por edhe ata funksionojnë si fasoneri, me material porositësi… E gjithë kjo ndodh në kushtet kur shteti nuk ka as Gjykatë Kushtetuese. Kështu ndodh gjithnjë kur qeveria shitet në publik “edhe më e mirë se vetë zoti…” Zoti na ruajt! Po shenjat janë të këqija.