Platforma e Berishës: Hapje e madhe, kreu i partisë jo doemos bëhet Kryeministër

Lideri historik i PD-së, Sali Berisha ka zbuluar disa detaje nga platforma e tij për rikthimin e Partisë Demokratike në pushtet. Para demokratëve të Korçës, Berisha tha se duhet të rikthehet demokracia brenda partisë dhe të ketë një hapje të madhe.

”Duhet hapje e madhe. Duhet të përthithim forcat, intelektualët, ekspertët më të mirë. Në mënyrë që të kemi qeverisjen më të mirë. As këto nuk mjaftojmë. Themeli është demokracia në parti dhe e drejta e votës”.

Berisha përsëriti edhe se kryeministër nuk do të jetë domosdoshmërisht kreu i partisë.

”Mua nëse më zgjidhni ju, unë duhet të vij tek ju dhe unë nëse nuk vij ju do më hiqni. Nuk do të jetë kusht që dhe kryetari i partisë të jetë dhe kryeministër. Edhe për kryeministër, pas fitoreve të zgjedhjeve do të vendosni ju. Vendimet do të jenë kolegjiale”.