Po arrihet shifra e 1 milion të vaksinuar, Manastirliu: Të hënën vijnë mbi 14 mijë vaksina Pfizer

Në Shqipëri janë mbi 922 mijë vaksinime anti-covid, që nga nisja e fushatës ”Shqipëria buzëqesh”. Për të arritur objektivin e 1 milion të vaksinuarve, ministrja e Shëndetësisë, Ogerta Manastirliu, bëri me dije se do të vijë sërish një dërgesë prej mbi 14 mijë doza të vaksinës Pfizer, teksa vijon vaksinimi i kombinuar i qytetarëve mbi 50-vjeç dhe i punonjësve të shërbimeve kritike.

“Ditën e hënë pritet të mbërrijnë rreth 14 mijë vaksina nga Pfizer, duke e çuar në mbi 1 milion vaksinat e mbërritura në Shqipëri dhe tashmë më shumë se 926 mijë vaksina janë kryer në të gjithë vendin. Jam e kënaqur që rrejti i qendrave shëndetësore, infrastruktura që ne kemi ngritur, siguron kushtet edhe për një vaksinimin në të gjithë vendin”. Ministrja po ashtu deklaroi se programi i vaksinimit do të vijojë përgjatë sezonit veror, duke bërë me dije se për ata të moshuar që e kanë të pamundur për të shkuar në qendrat shëndetësore, vaksinimi i tyre të kryhet në kushte shtëpie.

“Ne duhet të vijojmë programin tonë të vaksinimit dhe përgjatë gjithë sezonit veror fokusi do të jetë vijimi dhe intesifikimi i vaksinimit kudo në komunitet, duke siguruar që edhe ata të moshuar që ende nuk e kanë kryer vaksinën, t’i kryhet vaksina në kushte shtëpie, pra për ata që e kanë të pamundur për të ardhur në qendrat shëndetësore apo në qendrat e vaksinimit të përqëndruar”.

Vaksinimi po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë vendin. Duke folur për situatën e epidemisë në vend, Ministrja e Shëndetësisë bëri apel për vigjilencë dhe theksoi se do të intensifikohet programi i vaksinimit “Pavarësisht se jemi në një situatë shumë të kontrolluar të epidemisë në vend, kjo nuk do të thotë se duhet të ulim vigjilencën, e aq më pak, ritmin e vaksinimit”.

”Mos neglizhoni dozën e dytë”, është mesazhi i shefes së Departamentit të Epidemiologjisë, Silva Bino, që citon një studim, i cili vlerëson efektshmërinë e dozës së dytë edhe për variantin Delta të Covid-19, që duket më i rrezikshmi për momentin. ”Studimi më i fundit i Agjencisë të Shëndetit publik në Angli, akoma jo i certifikuar për peer review, tregon për herë të parë se 2 doza të vaksinave ndaj Covid-19 janë mjaft efektive ndaj hospitalizimeve nga varianti Delta (B.1617.2). Pritet që ky efekt te jete i lartë edhe ndaj vdekshmërisë. Analiza tregon se ky efektivitet i vaksinave është i krahasueshëm me atë ndaj variantit Alpha”.