Preç Zogaj: Bashkimi hapi i parë, por PD duhet të shkojë përtej vetes. Të rrisë numrin e mbështetësve

Analisti Preç Zogaj, ka dhënë qëndrimin e tij për tryezën që bashkoi ditën e martë Gazment Bardhin me ish-kryeministrin Sali Berisha. Për të partitë duhet të kenë mbështetjen e ndërkombëtarëve. Gjithashtu ai u shpreh se opozita duhet të rritet në elektorat, duke shtuar se deputetët janë të partisë.

“Institucioni bazë në politikë është partia, nuk janë deputetët, nuk e marrin deputetët partinë, ky është një keqkuptim. Janë të lirë të ikin të shkojnë në parti tjetër, të krijojnë një grup tjetër, por nuk e marrin partinë se ajo është institucioni. 

Konfigurimi i deputetëve nuk është tërheqje litari. Të gjithë besoj se bëjnë opozitë, dhe kjo që ndodh në opozitë është fotografia e ambicieve të larmishme, por të gjithë bëjnë opozitë. Në kushtet e krijuara, opozita duhet të institucionalizojë, atë që unë e quaj opozita plurale.

Duhet të rritet në elektorat me zgjedhësit sepse deputetët aty janë. Deputetët duhet të jenë të qartë se me cilin grup janë. Nëse krijohen kushtet për bashkimin e fraksioneve të krijuara, kjo është ngjarja për opozitën. PD nuk i mjafton vetëm bashkimi, por duhet të shkojë përtej vetes duhet të rrisë numrin e mbështetësve, por bashkimi është hapi i parë”,- tha ndër të tjera Preç Zogaj në ”News 24”.