Presidenti Begaj konferencë të përbashkët me Presidenten Osmani: Lidhja jonë e pandashme

Presidenti Bajram Begaj dhe Presidentja e Kosovës Vjosa Osmani kanë mbajtur një konferencë për mediat nga Prishtina.

Presidenti shprehu falënderimet për pritjet e ngrohtë dhe vëllazërore ndërsa tregoi bisedën që zhvilluan për qëndrimet dhe vizionin e dy vendeve.

“Jam i nderuar të jem në Prishtinë, në vizitën time të parë si President– dhe kjo jo thjesht në respekt të traditës, por si një simbolikë e natyrshme, që mishëron lidhjen tonë të pandashme dhe të pandryshueshme – e vulosur nga historia, gjuha jonë e përbashkët dhe heronjtë tanë ndër shekuj. Dy dialekte dhe një gjuhë, dy Republika dhe një komb, kjo është harta jonë e përbashkët patriotike me destinacion Brukselin dhe bashkimin tonë në aleancën EuroAtlantike”, tha Begaj.

Ndërsa Presidentja Osmani, në fjalën e saj deklaroi se Shqipëria ka qenë zëri i Kosovës, aty ku nuk ka përfaqësim.

“Uroj Shqipërinë për arritjet në rrugën drejt BE. Ne në Kosovë u gëzohemi arritjeve të Shqipërisë. Shqipëria i ka dhënë mbështetje Kosovës në të gjitha periudhat, ndërkohë keni qenë zëri ynë aty ku ne nuk jemi të përfaqësuar“, tha ndër të tjera Osmani.